Nga Rexhina Biba
Tek “Kodra e Priftit” në Tiranë po punohet t’i jepet një zgjidhje afatgjatë furnizimit me ujë për rreth 10.000 banorët që jetojnë në atë zonë.
Investimi i UKT-së pritet të ndihmojë këto familje që vuajnë mungesën e ujit prej vitesh, pasi që prej ’90-ës, furnizimi me ujë në këtë zonë është bërë kryesisht nga linja e transmetimit dhe nga burimi Bovillë-depo-Kinostudio, pa një studim dhe pa projekt.
Me anë të këtij investimi UKT synon t’i japë fund problemeve të furnizmit me ujë si dhe ndërtimit të një rrjeti të ri.
Por, sa i kanë respektuar rregullat e sigurisë gjatë punës Bashkia dhe UKT?
27.al ka realizuar disa foto ku mes tollovisë me gropa, me grumbuj dheu dhe gurë shohim fëmijë, të cilët e kanë kthyer në një hapësirë argëtuese këtë zonë punimesh.
Normalisht, dikush mund të presë tabelat orientuese apo parandaluese për rrezikshmërinë e zonës ku punohet, por kjo nuk ngjan, sepse si thotë kënga e Edi Ramës: “Gjithçka mund të ndodhë, jetojm’ në Tiron’!”. Në realitet atje ka fëmijë që rrezikojnë të lëndohen çdo ditë si pasojë e punimeve.
