Ish-trajneri i Partizanit tashmë është përgatitës atletik i Sportingut të Lisbonës, por ende ruan marrëdhëniet me drejtuesit e klubit të kuq
Dikur bënte foto me Gaz Demin dhe drejtonte Partizanin, tashmë Marcio Sampaio është pregatitës atletik i Sportingut të Lisbonës. Pas ndeshjes së parë të fazës së grupeve të Champions league, Real Madrid – Sporting, Sampaio i ka dërguar këtë foto drejtuesve të Partizanit dhe pasi i pyet si është gjendja e skuadrës, rikonfirmon dashurinë për të kuqtë, që sipas tij ka mbetur po e njëjta. “Shumë shpejt do të vij t’iu vizitoj, por kam frikë se po erdha, nuk do të kthehem më në Lisbonë”.
Sampaio u thirr si përgatitës atletik edhe tek Partizani, por më pas u ngrit në detyrë, duke iu besuar pankina për sezonin 2013-2014, megjithëse ende nuk e kishte liçencën PRO të trajnerit, që të lejon të ulesh në një pankinë të Kategorisë Superiore. Pasi iu ndërprenë marrdhëniet me klubin, portugezi u kthye sërish në shtëpi, por ekziston përsëri një ide për ta risjellë në Tiranë. Me ngritjen e Akademisë, drejtuesit e Partizanit mendojnë se do të kenë nevojë për shërbimet e Sampaios, por jo më në rolin e trajnerit dhe duket se Marcio është gjithmonë i gatshëm për të vazhduar aventurën e kuqe.
