Komisioni Europian ka parashikuar një ulje të lehtë në krahasim me atë të qeverisë, e cila parashikon që kjo shifër të jetë 3.4 %
Komisioni Evropian parashikon që rritja ekonomike e Shqipërisë në këtë vit të shkojë në 3.2% nga 3.3 për qind që e kishte bërë vlerësimin në muajin nëntor të 2015. Qeveria shqiptare ka parashikuar një zgjerim të ekonomisë prej 3.4 për qind.
Në parashikimin e bërë për vitin 2016, Komisioni Evropian ka vlerësuar si të arritshme objektivat e qeverisë për rritjen nominale të Prodhimit të Përgjithshëm Bruto me 6.2 për qind dhe një deficit prej 2.2 për qind të PBB-së.
Sipas Komisionit Europian, gazsjellësi Trans-Adriatik, ka të ngjarë të nxisë formimin e kapitalit fiks, si edhe investimet nga prodhuesit e naftës, që kanë rënë përsëri për shkak të çmimeve të dobëta të naftës bruto të papërpunuar. Komisioni pret që industria nxjerrëse do të ndikojë negativisht në aktivitetin ekonomik në vitin 2016, si rrjedhojë e çmimeve të ulëta. Po ashtu sipas komisionit moti ka detyruar edhe paqëndrueshmërinë e sistemit hidroenergjetik, i cili plotëson nevojat më të mëdha të energjisë elektrike.
Në parashikimet e tjera të Komisionit Europian janë edhe shpresa për një rikthim gradual të kredidhënies për bizneset si edhe fillimin e uljes që këtë vit të nivelit të borxhit publik.
