Ndryshe nga kryeministri Edi Rama që iu drejtua opozitës një ditë më parë me gjuhë vulgare dhe ofendime, deputeti socialist Erion Braçe ka bërë të kundërtën duke “zbutur” tonet në Kuvend.
Teksa po fliste për buxhetin dhe po shprehte pakënaqësitë e tij, fjalimi iu ndërpre nga ndërhyrjet e deputetes demokrate Ina Zhupa, të cilës ai preferoi t’i përgjigjej duke i thirrur me ëmbëlsi “zemër”.
Braçe: Unë nuk flas për protestën zemër. Unë flas për bujqësinë.
Zhupa: Nuk dëgjohet.
Braçe: Unë nuk flas për protestën. Je atje larg zemër nuk je këtu.
Nga ana tjetër, deputeti socialist nuk i kurseu kritikat për menaxhimin e buxhetit që po lëmë pas, ndërsa u shpreh i shqetësuar për projekt buxhetin e vitit të ardhshëm.
“Nuk dua të harroj që GDP-ja nuk mjafton, duhet rishpërndarja e të ardhurave. Një mjedis i degraduar nga rënia pas GDP-së dhe rënia në ndërtim, ul mirëqenien. Duhet zbatimi i buxhetit që miratojmë sot, troç duhet punë. Jam i shqetësuar për menaxhimin e buxhetit vitin e shkuar. Kjo vjen edhe prej mosrealizmit të shpenzimeve, këto janë shkurtime dhe unë jam kundër. Cilado njësi që dështon duhet marrë përgjegjësi, përfshirë përgjegjësitë publike. Duhet të na identifikojnë ne si të majtë. Tatimet e reja nuk na ndihmojnë me këtë. Po thyejmë sot marrëveshjen 25-vjeçare për të njohur evazionin fiskal me kompanitë e birrave. Nuk më bën krenar sepse jemi vonë”, tha Braçe.
Lexo edhe: Braçe nuk kursen kritikat për Krifcën: Bujqit janë kthyer në prodhues letrash
