Babë e bir u vranë me armë zjarri ditën e sotme në Klos, duke tronditur gjithë opinionin publik. Policia ka reaguar lidhur me ngjarjen, përmes një njoftimi zyrtar, sipas të cilit theksohet se autori kryesor i dyshuar është Fiqiri Mjeshtri, i cili ka vrarë veten pak minuta pasi ka kryer vrasjen e Liri dhe Kenad Shirës. Mjeshtri ka qëlluar veten me armë zjarri duke ngelur i vdekur në vend, në momentin kur është pikasur nga policia.
Në njoftimin për shtyp policia, thekson se dy të plagosur përkatësisht personat e identifikuar me emrat Fatmir Mjeshtri dhe Besnik Mjeshtri, vëllezërit e Fiqiri Mjeshtrit, kanë qenë bashkëpunëtorë në këtë ngjarje.
Nga hetimet paraprake dyshohet se vrasja e babë e bir Kenad dhe Liri Shirës është kryer për motive të dobëta. Ndërsa burime pranë gijotina.com bënë me dije, se mes dy fiseve ka patur konflikte të hershme.
“Në qytetin e Klosit, dyshohet se shtetasi F. M., 39 vjeç, në bashkëpunim me dy vëllezërit e tij, ka vrarë me armë zjarri, për motive të dobëta, shtetasin K. Sh., 17 vjeç, si dhe kanë plagosur shtetasit I. Sh., 46 vjeç (babai i 17-vjeçarit), R. H., 14 vjeç dhe E. H., 39 vjeç (babë e bir). Të tre të plagosurit janë transportuar në spital, për ndihmë mjekësore. Si pasojë e plagëve të marra, shtetasi I. Sh. ka humbur jetën në spital. Shërbimet e Policisë, menjëherë pas marrjes së njoftimit kanë rrethuar zonën, kanë bllokuar hyrje-daljet e qytetit të Klosit dhe kanë ushtruar kontrolle në banesa, lokale dhe në ambiente të tjera. Gjatë kontrollit të zonës, shërbimet e Policisë kapën dhe shoqëruan në ambientet e Policisë, shtetasin F. M., 44 vjeç dhe vëllanë e tij, shtetasin B. M., bashkëpunëtorë në këtë ngjarje. Gjithashtu, gjatë kontrollit të zonës, shërbimet e Policisë kanë gjetur të pajetë, dyshohet të vetëvrarë, autorin kryesor të kësaj ngjarjeje, shtetasin F. M., 39 vjeç”, njofton policia.
