Kryetari i Partisë së Lirisë, Ilir Meta ka publikuar disa të dhëna nga Komisioni Evropian, në Ditën Ndërkombëtarë të Mësuesit, sipas të cilave tregohet se arsimtarët shqiptarë rezultojnë më të keqpaguarit.
Meta pasqyron nga të dhënat shifrën prej 4, 233 euro në vit, duke e renditur kështu pagën e mësuesit shqiptar të fundit në Evropë dhe rajon.
“DITA NDËRKOMBËTARE E MËSUESIT i gjen sot arsimtarët shqiptarë më të keqpaguar se të gjithë kolegët e tyre në rajon dhe në kontinent. Të dhënat e përpiluara nga Komisioni Evropian, të bëra po sot publike nga “Euronews” e renditin pagën e mësuesit shqiptar të fundit në Evropë me rreth 4,233 euro në vit, shumë herë më pak se të ardhurat vjetore nga paga të një mësuesi në Maqedoninë e Veriut, Bosnjë-Hercegovinë, Serbi apo Malin e Zi ku mësuesit paguhen dy herë sa këtu”, shkruan Meta.
Ndër të tjera kreu i Partisë së Lirisë, hedh akuza ndaj qeverisë e cila nuk bëri asgjë për ta ndryshuar gjendjen e arsimit shqiptar, teksa në Ditën Ndërkombëtare të Mësuesit pedagogët protestojnë për dinjitetin e tyre.
“Dhjetë vite në pushtet, Edi Rama nuk bëri asgjë për të ndryshuar gjendjen e rëndë në arsimin shqiptar, përkundrazi Dita Botërore e Mësuesit i gjeti sot pedagogët dhe profesorët në protestë për dinjitetin e tyre, trajtim financiar të paktën sa Kosova dhe kushte më të denja mësimdhënie. Në vend të dëgjojë zërin e arsimtarëve, Qeveria thellon arrogancën deri në mbylljen e shkollave dhe kopshteve, si dhe refuzon të plotësojë kërkesat e tyre plotësisht të drejta dhe të realizueshme”, tha Meta.
Sipas Metës, qeverisë i intereson më tepër aferat e inceneratorëve dhe koncesioneve sesa gjendja e rëndë në të cilën ndodhet arsimi. Ndërsa Shqipëria sipas tij ka buxhetin më të ulët në rajon për arsimin.
“Shqipëria ka buxhetin më të ulët në rajon për arsimin sepse prioriteti i Rilindjes janë inceneratorët, koncensionet, PPP-të, rrugët e florinjta dhe tenderat sekretë. Arsim cilësor pa buxhetim nuk mund të ketë! Vetëm arsimi, si prioritet kombëtar, sjell zhvillim të qëndrueshëm, frenon shpopullimin dhe garanton të ardhmen e sigurt europiane! Rritja e menjëhershme e pagave për pedagogët dhe profesorët duhet të jetë hapi i parë!”, tha Meta.
