Kreu i Partisë së Lirisë, Ilir Meta ka folur për mediat pas takimit me Presidentin Bajram Begaj. Meta deklaroi para kamerave se data për zgjedhjet lokale duhet të vendoset sa më shpejt, në mënyrë që sipas tij, qytetarët të shpëtojnë nga “kjo zgjedhë moniste në pushtetin vendor”.
“Ishte një kënaqësi që të takohesha më Presidentin me kërkesën e tij sot për të diskutuar për zgjedhjet e ardhshme vendore. Qëndrimi im shumë i qartë sa më parë të shpallet kjo datë në respekt të gjithë afateve kushtetuese e ligjore. E besoj se kështu do të ndodhë sepse një orë e më parë qytetarët e Shqipërisë duhet të shpëtojnë nga kjo zgjedhë moniste në pushtetin vendor nga ky shpërdorim i taksave të tyre, hapësirave, e gjithçka që ka ardhur nga degradimi i një pushteti monist vendor. Rikthimi i opozitës dhe pluralizmit politik në këshilla bashkiakë do japë kontribut për forcimin e llogaridhënies. Data konkrete i takon vetë Presidentit dhe nuk besoj se një javë më parë apo një javë më shumë është e rëndësishme. Ai që duhet të gjykojë pasi ka dëgjuar aktorët. Data të dihet sa më parë e KQZ të ndërmarrë veprimet e saj”, tha Meta.
