Tre persona janë arrestuar paraditen e sotme në kryeqytet. Lidhur me ngjarjen, policia informon se në pranga ka përfunduar një 20-vjeçar i cili është kapur me sasi të vogël lënde narkotike e llojit kokainë. Po ashtu, i arrestuar është dhe një 44-vjeçar i cili ka ushtruar dhunë fizike ndaj bashkëshortes së tij. Në pranga ka përfunduar dhe 25-vjeçari me inicialet N.L, pasi policia i gjeti një dorezë metalike.
“Vihen në pranga 3 shtetas, për vepra të ndryshme penale. Specialistët e Seksionit për Hetimin e Narkotikëve arrestuan shtetasin L. Ç., 20 vjeç, pasi gjatë kontrollit fizik nga shërbimet e Policisë, iu gjet dhe iu sekuestrua në cilësinë e provës materiale, një sasi e vogël lënde e dyshuar narkotike kokainë, e ndarë në doza.
Specialistët për Hetimin e Krimeve të Komisariatit të Policisë Nr. 3 arrestuan në flagrancë shtetasin D. B., 44 vjeç, banues në Tiranë, pasi ka ushtruar dhunë fizike ndaj bashkëshortes së tij. Specialistët për Hetimin e Krimeve të Komisariatit të Policisë Nr. 6 arrestuan në flagrancë shtetasin N. L., 25 vjeç, pasi gjatë kontrollit fizik nga shërbimet e Policisë, iu gjet dhe iu sekuestrua në cilësinë e provës materiale, një dorezë metalike.”
Së fundmi, materialet i kaluan Prokurorisë, për veprime të mëtejshme procedurale lidhur me situatën.
