Deputetët e opozitës janë revoltuar me zv/kryetaren e Kuvendit Ermonela Felaj pas ndërprerjes të fjalës së tyre për disa herë me radhë. Deputeti Luan Baçi u shpreh se sa herë që Felaj drejton seancën plenare ajo degradon.
“Sa herë drejtoni seancën ju seanca degradon. Po kalojmë në orë që po diskutojmë se kush artikulon më bukur”, u shpreh Baçi.
Nga ana tjetër edhe deputeti demokrat Saimir Korreshi ironizoi drejtuesen e seancës për diskutimet në Kuvend.
“Duke qenë se po dëgjojmë përralla me mbret t’i shtyjmë për ditën e shtunë. Na keni vjedhur edhe rregulloren këtu nuk po e gjejmë”, u shpreh Korreshi.
Të njëjtin qëndrim me deputetët e PD, pati edhe deputeti i Partisë së Lirisë Petrit Vasili.
“Frenojeni protagonizmin tuaj sepse po dëmtoni seancën. Po prishni seancën. Abuzoni vazhdimisht me të drejtën e fjalës së ministrave. Çfarë thuhet për çështjet e procedurës? Fjala jepet menjëherë”, u shpreh Vasili.
