Presidenti i Serbisë, Aleksander Vuçiç, në një konferencë për media pas takimit më Këshillin e Sigurisë ka bërë të ditur për atë se çfarë kanë diskutuar brenda. Kreu i shtetit serb ka thënë se të premten mbrëma ka pasur një komunikim me këshilltarët e Macron dhe Scholz dhe se një bisedë e tillë s’ka qenë e lehtë.
Vuçiç gjithashtu ka treguar se ka marrë nga dy këshilltarët një propozim për një kornizë krejtësisht të re për bisedimet në Bruksel, e cila siç ka thënë ai duhet të çojë tek zgjidhja përfundimtare me Republikën e Kosovës, raporton N1.
Vuçiç ka treguar se mesazhi i ndërkombëtarëve ka qenë që në situata kur ka një luftë që po zhvillohet në Evropë, nuk ka nevojë për një tjetër konflikt të ri, por i kanë treguar se ka nevojë për një zgjidhje sa më shpejtë.
“Biseda nuk ishte aspak e lehtë dhe në thelb mund të them disa gjera. Përfaqësuesit e shteteve më të fuqishme evropiane, të cilët theksuan se kanë mbështetjen e SHBA-së dhe Turqisë për këtë, besojnë se në kushtet kur ka një luftë në Evropë, nuk ka nevojë për konflikte të reja dhe se është e nevojshme të arrihet zgjidhja më e shpejtë e mundshme”, ka thënë Vuçiç.
