Futbollisti i Kombëtares shqiptare, Armando Broja ka rinovuar deri në vitin 2028 me Chelsean duke u vendosur kapak zërave për një largim të mundshëm të tij edhe pse merkato tashmë është mbyllur. Sulmuesi shqiptar konfirmohet kështu në planet afatgjata të klubit në pronësi të amerikanëve. Lajmin e bën të ditur Chelsea që thekson se tashmë marrëveshja e re me Brojën është firmosur.
“Nuk kam fjalë për ta përshkruar këtë ndjesi. Chelsea është klubi që kam ëndërruar gjithë jetën, klubi që mbështes dhe e dua. Kam qenë këtu që fëmijë dhe është një ndjesi surreale për familjen time. Është fantastike çdo minutë në fushë me këtë fanellë sepse bëhet fjalë për një nga klubet më të mëdhenj të botës. Ka shumë konkurrencë dhe të gjithë dëshirojnë të luajnë këtu prandaj jam shumë i lumtur që jam pjesë e kësaj skuadre” – është shprehur Broja.
Broja është aktivizuar në tre ndeshje nga pankina këtë sezon ndërsa pati një impakt të madh te Southampton sezonin e kaluar ku në 38 ndeshje shënoi 9 gola.
Presidenti Todd Boehly, u shpreh: “Ne jemi shumë të lumtur që Armando është pjesë e Chelseat. Ai është një sulmues i ri dhe shumë tërheqës. Broja është i ri dhe një sulmues që do të jetë pjesë kryesore e planeve tona për të ardhmen”.
