Serbia vazhdon të nxisë tensione mes saj dhe Kosovës. Ditën e sotme, në të gjitha pikat kufitare me Kosovën janë afishuar disa njoftime, ku shkruhet se Serbia nuk e pranon pavarësinë e Kosovës. Në poster thuhet se, përdorimi i letërnjoftimeve të lëshuara nga Republika e Kosovës është mundësuar vetëm për arsye praktike, për hir të lirisë së lëvizjes.
Ndër të tjera theksohet se përdorimi i kartave të identitetit të lëshuara nga autoritetet shtetërore të Kosovës nuk mund të interpretohet si pëlqim i Beogradit për të devijuar nga Rezoluta 1244 e Këshillit të Sigurimit të OKB-së. Këto lloj njoftimesh janë vendosur një ditë përpara fillimit të zbatimit të ujdisë për pranimin e letërnjoftimeve përkatëse. Afishet janë shkruar në serbisht dhe anglisht.
