Në prag të shenjtërimit të Nënë Terezës, shteti i Vatikanit do të emetojë një pullë postare në nderim të figurës së shenjtores shqiptare.
Prej datës 2 shtator do të hidhen në treg 150 mijë pulla postare kushtuar Nënë Terezës. Vlera e pullës do të jetë 0.95 cent.
Realizimi i kësaj pulle është bërë nga artisti italian Patrizio Daniele. Nën mbishkrimin Nënë Tereza Shenjtore, besimtarja shqiptare shfaqet në dy momente; me buzëqeshjen e saj klasike, plot mirësi, si dhe ndërsa ecën dorë më dorë me një vogëlushe. Larg në sfond duket katedralja Shën Palit në Kalkuta të Indisë.
Kjo është hera e dytë që shteti i Vatikanit hedh në qarkullim një seri pullash dedikuar procesit të shenjtërimit të Nënë Terezës.
Më shtator të vitit 2003 është emetuar pulla postare kushtuar nisjes së procesit të Lumturimit të Nënë Terezës me vlerë 0.41 cent.
