Për të katërtën ditë radhazi pronarët e skafeve kanë dalë sërish në protestë. Ditën e sotme të ardhura nga Durrësi, Velipoja, Vlora dhe Himara ata janë mbledhur para Drejtorisë së Policisë në Tiranë, ku kërkojnë një sqarim mbi vendimin për pezullimin e mjeteve lundruese. Një nga protestuesit shprehet se ata po vijnë aty që të marrin një shpjegim pse iu janë bllokuar skafet dhe sa do të zgjasë vendimi. Ai tha se nuk duhet të pezullohen të gjithë për një person që u tregua i papërgjegjshëm dhe shkeli ligjin.
“Ne e ngushëllojmë familjen e vajzës se jemi vetë prindër, por edhe ne me këto mjete sigurojmë bukën e gojës, na është hequr pa të drejtë. Ne kërkojmë sot vetëm një sqarim sa do të zgjas ky vendim dhe pse për disa bëhen tolerime, pasi policia na ka thënë që janë pezulluar për t’u bërë verifikimet e dokumentacioneve. Por, derisa të mbyllet ky proces verifikimi sezoni mbaroi dhe për ne është një dëm i madh ekonomik”, u shpreh ai. Ndërsa shtoi se do të vazhdojnë protestën sot dhe nuk largohen nga aty pa marrë një takim me përfaqësues të Policisë së Shtetit.
