Ndërkohë që ditën e djeshme vendi ynë çeli zyrtarisht negociatat me Bashkimin Europian, agjencia e njohur e Brukselit, EurActiv shkruan se pengesa më e madhe e Shqipërisë në rrugën e integrimit është sundimi i ligjit.
Sipas ekspertëve, sistemi shqiptar i drejtësisë ende vuan nga korrupsioni i përhapur, mungesat profesionale dhe joefikasiteti strukturor, me besimin e publikut tek gjykatat dhe zbatimi i ligjit që mbetet jashtëzakonisht i ulët.
“Reforma në drejtësi e mbështetur nga BE filloi në Shqipëri në vitin 2016 dhe parashikon verifikimin e çdo prokurori dhe gjyqtari në vend. Procesi, megjithatë, ka ecur me ritme të ulëta dhe ka qenë i mbushur me vështirësi.
Me pak se gjysma e anëtarëve të gjyqësorit janë verifikuar, gjysma kanë dhënë dorëheqjen pasi kanë vlerësuar pasurinë, reputacionin dhe kualifikimet e tyre. Kjo e çoi Gjykatën Kushtetuese dhe Gjykatën e Lartë në bllokim për gati dy vjet dhe shkaktoi një grumbullim të çështjeve deri në dhjetëra mijëra.
“Në vitin 2021, mandati për vazhdimin e reformës u zgjat, pavarësisht se besimi i qytetarëve për këtë proces po binte çdo vit, sipas disa sondazheve të pavarura. Për më tepër, sistemi i drejtësisë është duke u përballur me vonesa, me mijëra çështjes penale dhe civile presin që të trajtohen. Për ata që janë shkarkuar për shkak të mospërputhjeve me pasurinë e tyre dhe problemeve me korrupsionin, mungesa e ndjekjeve penale, e lëre më pas e dënimeve, ka ndezur zemërim në shtëpi dhe në Bruksel”.
I pyetur nëse ndjekjet penale të zyrtarëve gjyqësorë do të trajtohen gjatë procesit të pranimit, Varhelyi tha se kjo do të trajtohet kur të hapet grupi i parë i negociatave, mbi sundimin e ligjit.
“Ne do të punojmë me sundimin e ligjit dhe padyshim që do të diskutohet për gjendjen e gjyqësorit. Unë vetëm mund të konfirmoj se ne nuk do të tërhiqemi nga kërkesat tona: duhet të ketë prova që ekzistojnë dhe raste që duhet të zgjidhen, dhe këto duhet të zgjidhen.”
Ditën e djeshme u mbajt në Bruksel konferenca e parë ndërqeveritare me Bashkimin Europian. Tashmë Shqipëria zyrtarisht ka çelur negociatat me BE. Hapja e negociatave do të thotë një proces teknik që nis me kontrollin e plotë të administratës shtetërore shqiptare dhe të gjithë legjislacionit shqiptar që të përafrohet me legjislacionin e Bashkimit Europian.
