Ish-ministri i Brendshëm Saimir Tahiri, mesa duket nuk po gjen qetësi edhe në qelitë e burgut. Sipas informacioneve, ish-ministri është përplasur me drejtorin e burgut të Fierit Arjan Hasani dhe si pasojë e këtij konflikti, ai ka kërkuar që të transferohet nga ky burg, e ta vuajë dënimin në një nga burgjet e tjera të sigurisë së zakonshme.
Mësohet se Tahiri prej javësh ka shprehur pakënaqësi për kushtet brenda institucionit të vuajtjes së dënimit për të burgosurit, dhe rregullat që duhet të vendosin familjarët e tyre. Një nga konfliktet mes tij, dhe drejtorit është uji i pijshëm, ku sipas rregullave të izoluarit në këtë burg, nuk u lejohet të furnizohen nga familjarët, por ujë të blihet në dyqanin e burgut.
Tahiri qëndron në qeli prej 4 shkurtit të këtij viti, pasi u dënua me vendim të formës së prerë me 3.4 vite burg. Tre ditë pas vendimit, Tahiri la ambientet e paraburgimit 313 për tu transferuar në Fier, por pas gati 6 muajsh në këtë institucion, ish ministri i Brendshëm, ka kërkuar transferimin, ku me shumë gjasa transferimi i tij pritet të ndodhë brenda pak ditësh. Kujtojmë se rreth një muaj më parë ish ministri i brendshëm kërkoi pezullim të dënimit dhe atë ta kryente në shtëpi, me argumentin se në burg i rrezikohej jeta.
