Presidenti i Kosovës, Hashim Thaçi ka pritur këtë të hënë përfaqësuesin special të Sekretarit të Përgjithshëm të Kombeve të Bashkuara, Zahir Tanin. Në qendër të bisedimeve të tyre ishte bashkëpunimi i institucioneve të Republikës së Kosovës me zyrën e Përfaqësuesit Special për çështjet me interes reciprok.
Thaçi u shpreh se Kosova është mirënjohëse për rolin që Kombet e Bashkuara kanë luajtur në Kosovë pas luftës dhe kujtoi se edhe proçesi i shpalljes së pavarësisë së Kosovës është nisur nga Kombet e Bashkuara, mbi “Rezolutën 1244”, si dhe është zhvilluar në kuadër të Kombeve të Bashkuara, që kishin emëruar edhe emisarin e tyre, presidentin Ahtisaari, për të udhëhequr proçesin.
“Nuk mund të kthehemi më në kohën para vitit 2008, para shpalljes së Pavarësisë”, u shpreh presidenti Thaçi, duke shtuar se tani është koha për një cilësi tjetër të bashkëpunimit me përfaqësuesin special të Sekretarit të Përgjithshëm dhe me Kombet e Bashkuara.
Përfaqësuesi Zahir Tanin u shpreh i kënaqur me bashkëpunimin me autoritetet kosovare dhe tha se “duhet të jemi konstruktivë në kërkim të bashkëpunimit me interes reciprok. Jemi urë mes Kosovës dhe Kombeve të Bashkuara”.
Thaçi u shpreh se ka një varg temash me interes për Kosovën dhe rajonin, në të cilin mund të ndihmojë edhe përfaqësuesi special i Sekretarit të Përgjithshëm me ekipin e tij, siç është çështja e të pagjeturve dhe lufta kundër terrorizmit.
