Policia e Tiranës ka identifikuar dhe arrestuar personat e dyshuar për atentatin në burgun e Vaqarrit. Të arrestuarit janë 25-vjeçari Ergys Kolaveri dhe 24-vjeçari Enea Ceka, të dy banues në kryeqytet.
Ditën e shtunë, rreth orës 16:30, në ambientet e ajrimit, brenda burgut të Vaqarrit, u plagos me armë zjarri në pjesën e këmbës shtetetasi Lili Dulaj, i dënuar më parë në shtetin e Kosovës për shkelje të rregullave të qarkullimit rrugor dhe aktualisht i burgosur për dhunë në familje. I plagosuri ndodhet në Spitalin Ushtarak jashtë rrezikut për jetën.
Nga hetimet ka rezultuar se ky person është goditur nga një distancë e konsiderueshme jashtë mureve rrethuese të këtij burgu.
Gjatë veprimeve të para hetimore, ka rezultuar se, shtetasi Lili Dulaj nuk ka qenë shënjestra e këtij atentati, pasi shënjestër ka qënë shtetasi Gazmir Daci, i cili ndodhet në masën arrest në burg për vrasje, vrasje e ngelur në tentativë dhe armëmbajtje pa leje. Në datën 04 nëntor 2015, pas një konflikti të mëparshëm, ka vrarë me armë zjarri shtetasin Valmir Kolaveri dhe plagosur rëndë vëllanë e tij Robert Kolaveri, i cili aktualisht është i paralizuar.
Nga verifikimet e kryera, ka rezultuar se nga vendi i ngjarjes është larguar me shpejtësi një automjet tip Mercedes Benz Vito, ku nga verifikimet rezulton posedues shtetasi Ergys Kolaveri, vëllai i Valmir dhe Robert Kolaverit. Në momentin e kapjes së tij, ai ka qenë sëbashku me shtetasin Enea Caka, kushëri i tij.
Gjatë kontrollit të mjetit në pjesën e poshtme të sediljes së automjetit janë gjetur një palë dylbi për pamje në largësi, të cilat janë sekuestruar në cilesinë e provës materiale.
Grupi hetimor po vazhdon punën për sqarimin e gjithë dinamikës së ngjarjes dhe autorëve të tjerë të mundshëm të përfshirë në këtë vepër penale.
