Ndërmjet bashkisë dhe tatimeve në Shkodër nuk ka asnjë marrëveshje për hapësirat publike. Kjo ka sjellë si rezultat përplasje në distancë mes tyre për zonat e plazhit duke bërë që pasojat t’i vuajnë pushuesit. Bashkia Shkodër nuk ka pranuar të hedhë firmën në marrëveshjen e bashkëpunimit me drejtorinë e tatimeve për kontrollin e sipërfaqes ranore. Titullari i këtij institucioni Hysen Hysaj e bën publik një fakt të tillë, i cili sqaron se ky ngërç ka krijuar për pasojë kontrolle të ndara.
Hysen Hysaj, drejtor i DPT Shkodër: Meqënëse ai program nuk u firmos asnjëherë unë kam vijuar kontrollet e bizneseve në Velipojë.
Hysaj i deklaron sfidë të hapur bashkisë teksa tha se sapo ajo të dërgojë listat e subjekteve që nuk janë të pajisura me liçensë, menjëherë tatimet nisin konfiskim të shezlloneve.
Hysen Hysaj: Unë do ta falenderoja bashkinë nëse më vë në dispozicion listat që thotë i kam dhe janë të përcaktuara subjektet e paliçensuara. Ku ta merrja të kisha një bashkëpunim të tillë. Nëse pas verifikimit vërtetohet atëherë bizneset konfiskohen.
Nga 1 gushti tatimorët do të rikthehen në terren, ku në fokus të kontrolleve do të kenë lëshimin e kuponit tatimor dhe kasat fiskale.
Kryetatimori i Shkodrës pranon se aktualisht ka mungesë të inspektorëve për të mbuluar situatën në të gjitha zonat.
