Prej disa kohësh po qarkullon lajmi se Kosova do të aplikojë për t’u anëtarësuar në Këshillin e Europës në maj ndërkohë që pritet të bëhet aplikimi ditën e sotme.
Para disa javësh gazetari gjerman Michael Martens në një shkrim në gazetën Frankfurter Allgemeine Zeitung me titull “Rusia jashtë, Kosova brenda”, ka deklaruar se Kosova së shpejti mund të jetë anëtari më i ri i Këshillit të Europës.
Në shkrimin e tij Martens thekson se qeveria e Kosovës po planifikon aplikimin për anëtarësim në KiE pas zgjedhjeve në Francë, ndërsa kjo mund të sjellë në pranimin e Kosovës në vitin 2023.
Për aplikimin e Kosovës për anëtarësim në KiE, ka folur edhe deputeti gjerman, Knut Abraham.
Abraam ka thënë se pas përgjigjes inkurajuese të Gjermanisë për të mbështetur anëtarësimin e Kosovës në Këshillin e Europës, hapi tjetër do të ishte që Kosova të dorëzojë aplikacionin e saj, në mënyrë që të diskutohet në seancën e ardhshme të Komitetit të Ministrave në Torino më 20 maj.
Michael Martens ka thënë gjithashtu se Kosova i ka mundësitë e mira për tu anëtarësuar.
“Këshilli i Europës mund të ketë së shpejti një anëtar të ri. Sipas informatave të FAZ nga Prishtina, qeveria e Kosovës po planifikon të aplikojë për anëtarësim pas zgjedhjeve në Francë, ndoshta në maj. Kjo mund të çojë në pranimin e Kosovës në vitin 2023. Perspektivat vlerësohen si të mira në kryeqytetin e Kosovës, sepse përjashtimi i Rusisë, do të thotë se aleati më i rëndësishëm i Serbisë ka dalë nga Këshilli i Europës”,shkruan Frankfurter Allgemeine Zeitung.
E presidentja e vendit, Vjosa Osmani kohë më parë kishte paralajmëruar aplikimin për anëtarësim në Këshill të Europës.
Gjatë një konferencë për media që e kishte pasur në Prishtinë, gjatë vizitës së presidentit letones, Egils Levits, ky i fundit kishte shprehur mbështetjen e plotë për anëtarësimin e Kosovës në KiE si dhe në organizata të tjera ndërkombëtare.
“…Së paku është e domosdoshme që Kosova t’i bashkohet Partneritetit për Paqe. Mendoj se tani është koha e duhur por varet nga NATO… Është shumë me rëndësi të fuqizohet bashkëpunimi… Letonia e përkrahë këtë hap”, kishte thënë ai, raporton Telegrafi.
“Ne do të mirëpritnim aplikimin e Kosovës në Këshillin e Europës, prandaj ne mund të shkëmbejmë përvojat tona për të gjetur rrugën drejt anëtarësimit. Unë do ta mirëpres Kosovën si anëtare e Këshillit të Evropës”, ka thënë ai.
Ndryshe, Këshilli i Evropës është institucioni më i vjetër i të drejtave të njeriut në Evropë që bashkon demokracitë nga i gjithë kontinenti për të mbrojtur të drejtat e njeriut.
Vlerësohet se përfitimi kryesor i një anëtarësimi të mundshëm të Kosovës në Këshillin e Europës do të jetë për qytetarët pasi ata do të kenë qasje në Gjykatën për të Drejtët e Njeriut.
Pos kësaj është edhe aspekti diplomatik dhe politik i afirmimit të shtetësisë së Kosovës.
Shtetasit e Kosovës do të mund t’i drejtoheshin këtij institucioni nëse do të mendonin se u janë shkelur të drejtat e tyre nga shteti i Kosovës apo cilido shtet anëtarë i Këshillit.
Mirëpo kjo mund të arrihet vetëm kur janë shterur të gjitha mundësitë ligjore brenda vendit.
Procedurat kërkojnë që një shtet anëtarë i Këshillit të Europës propozon anëtarësimin e Kosovës në Komitetin e Ministrave.
Pas kësaj Asambleja e Këshillit të Europës kërkon opinion nëse Kosova i plotëson kriteret juridike për t’u bërë anëtar fuqiplotë.
Për anëtarësim kërkohen 2/3 e votave të përgjithshme që Kosova i ka, duke u bazuar në shtetet që kanë njohur vendin tonë
Ndërkaq, më 16 mars Federata Ruse është përjashtuar nga Këshilli i Europës. Procedura për t’i dhënë fund anëtarësimit të Rusisë filloi fillimisht më 25 shkurt – një ditë pasi forcat e presidentit rus, Vladimir Putin sulmuan Ukrainën.
