Bashkia e Tiranës ka përfunduar rikonstruksionin e kopshtit “Bambi” në Njësinë Administrative Nr. 10, i cili tashmë do të mirëpresë dyfishin e kapacitetit të fëmijëve.
Teksa përuroi ambientet kryebashkiaku Veliaj njoftoi se kopshtet nuk do të mbyllen as gjatë muajve të verës.
“Kemi një kopësht me dyfishin e kapacitetit, i cili shkon nga 100 në 200 vende. Gjithashtu, kemi një fluks të jashtëzakonshëm kërkesash nga prindërit për të sjellë fëmijët e tyre. Pas disa vitesh, praktika e vendosur jo zyrtarisht në bashki që i mbyllte kopshtet gjatë muajit gusht, merr fund këtë verë…në mënyrë që prindërit që i kanë bërë pushimet ose nuk kanë patur mundësi t’i marrin ato, të kenë një hapësirë ku të lenë fëmijët”.
Veliaj sqaroi gjithashtu se çdo leje e re ndërtimi do të kushtëzohet me ndërtimin e një institucioni social apo arsimor.
“Me planin e ri vendor Bashkia e Tiranës do të aplikojë politikën se çdo leje ndërtimi do të kushtëzohet me ndërtimin e një kopshti, një çerdhe ose një shkolle, sepse është e vetmja mënyrë që teksa Tirana urbanizohet, krijojmë më shumë mundësi për ata që zgjedhin të jetojnë në Tiranë”.
Duke risjellë në vemëndje investimet e tjera në njësinë 10, Veliaj theksoi se bashkia i kushton vëmendje jo vetëm qendrës, por edhe periferisë.
