Kryeministri i Kosovës, Albin Kurti është deklaruar ditën e sotme pas takimit me senatorët amerikanë se asnjëherë nuk ka qenë më e rëndësishme që shtetet demokratike të qëndrojnë së bashku kundër luftës së Rusisë në Ukrainë. Ai gjithashtu shtoi se Kosova qëndron krahë Ukrainës në këtë luftë dhe e mbështet atë që nga fillimi i saj.
“Në takimin tonë të përbashkët kam theksuar se kurrë nuk ka qenë më e rëndësishme se tani që shtete demokratike të qëndrojnë bashkë kundër luftës agresore dhe ilegale të Russisë në Ukrainë., me këtë rast edhe njëherë e ritheksojmë solidaritetin dhe admirimin tonë për popullin e Ukrainës, lidershipin politik të tij dhe qëndrueshmërinë e luftës çlirimtare që po bëjnë”.
Nga ana tjetër, Kurti deklaroi se Kosova ka mbështetur qëndrimin e Shteteve të Bashkuara të Amerikës për luftën në Ukrainë, teksa tha se senatorët i ka njoftuar edhe për sukseset e Kosovës.
“Në këtë kontekst Kosova ka mbajtur qëndrimin e njëjtë me ShBA-të, BE-në dhe shtete e NATO-s, ndërkaq në anën tjetër kemi autokracitë të cilët mund të jenë të ndara nga populli i tyre por po bashkëpunojnë me njëra-tjetrën. Në veçanti i njoftova senatorët për sukseset e shtetit të Kosovës, për të cilat ShBA-të kanë kontribuar aq shumë, si në luftë ashtu edhe në paqe , si para shpalljes së pavarësisë ashtu edhe pas saj”.
Së fundmi, Kryeministri Kurti e ka mbyllur fjalën e tij duke u shprehur se po ashtu është e rëndësishme që ShBA-të të mbështesin anëtarësimin e Kosovës në NATO.
“Edhe në atë takim patëm kërkuar mbështetjen e SHBA-së për anëtarësimin e Kosovës në NATO për çfarë është e rëndësishme që Kosova të bëhet pjesë e programit të partneritetit për paqe drejt anëtarësimit të plotë”.
