Një 28-vjeçar mbeti i plagosur mbrëmjen e sotme me armë zjarri në qytetin e Shkodrës. Ngjarja ndodhi rreth orës 22:00 në lagjen “Perash”.
Lidhur me ngjarjen, bëhet me dije se i plagosur mbeti Edis Reçaj, 28 vjeç, banues në lagjen Dobraç i cili u paraqit në spital me plagë në këmbë.
Ndërkohë në njoftimin e policisë thuhet se blutë sapo morën raportimet për të shtëna me armë zjarri, kanë shkuar menjëherë në vendngjarje.
Pas mbërritjes së policisë është rrethuar zona dhe janë ngritur pika kontrolli dhe vijon monitorimi i territorit për të bërë të mundur identifikimin dhe kapjen e autorit/ëve.
“Më datë 19.04.2022, rreth orës 22:00, në lagjen “Perash”, Shkodër, në rrethana ende të paqarta, është plagosur me armë zjarri në këmbë, shtetasi E. R., 28 vjeç, banues në lagjen “Partizani”, Shkodër, i cili ndodhet jashtë rrezikut për jetën. Shërbimet e Policisë me marrjen e njoftimit për të shtëna me armë zjarri, kanë shkuar menjëherë në vendngjarje, është rrethuar zona, janë ngritur pika kontrolli dhe vijon krehja e territorit për të bërë të mundur identifikimin dhe kapjen e autorit/ëve.”
Së fundmi, grupi hetimor ndodhet në vendngjarje dhe nën drejtimin e Prokurorisë, po punon për fiksimin e çdo prove të mundshme, që do ti shërbejë hetimit për zbardhjen e ngjarjes.
