Ministrja e Arsimit Evis Kushi ka sfiduar deputeten e Partisë Demokratike Albana Vokshi që të provojë akuzat e saj në lidhje me ndërhyrjen e ministres apo të stafit të saj në proceset e testimit dhe vlerësimit të mësuesve dhe se do të depozitojë padi për shpifje në gjykatë.
Deklarata e ministres erdhën pasi deputetja Albana Vokshi denoncoi daljen e tezës së vlerësimit të mësuesve. Deputetja e Partisë Demokratike Albana Vokshi publikoi një denoncim nga një mësuese në Elbasan, e cila kishte dërguar me dokumente pyetjet e provimit që i kishte shpërndarë drejtori i shkollës një ditë para provimit në Tiranë.
Ministrja Evis Kushi tha se do të largohet nga detyra që sot nëse Vokshi provon akuzat dhe në të kundërt deputetja do të mbajë përgjegjësi morale dhe ligjore për shpifje.
“Qytetarët nuk mund të helmohen çdo ditë me shpifje. Është turp dhe e pafalshme që, për qëllime politike, të shpërdorohet besimi i qytetarëve nga karrigia e deputetit, duke sajuar akuza që cënojnë besueshmërinë dhe nxitin pasiguri te mësuesit dhe nxënësit për proceset vlerësuese në sistemin arsimor” – shkruan ministria Kushi në platformën në facebook.
