Fatmir Xhafaj, kreu i Komisionit të Posaçëm për Reformën në Drejtësi, e konsideroi të drejtë kërkesën e Petrit Vasilit për tu informuar rreth propozimit të ri dhe negociatave të fundit. Xhafaj sqaroi se negociatat për të vetmen pikë të vetme ku palët ndahen po zhvillohen jashtë mbledhjes së Komisionit, mes dy partive politike PD-PS.
Deklaratat Xhafaj i bëri pas mbledhjes së grupit parlamentar socialist. Sipas tij, propozimi i SHBA është një prej katër propozimeve që PS i kishte ofruar më herët PD për arritjen e konsensusit.
Xhafaj:Jam përfaqësues i PS, kryetar i Komisonit për reformën në drejtësi, nuk jam përfaqësues i PD që përpara se të negociojnë negociatorët marrin dijeni për atë që do negociojnë nga televizioni. Po negociohet dhe kemi rënë dakort që kur ka negociata jemi dhe konfidencialë. Kjo është shenjë serioziteti dhe pjekurie politike.
Letra e Vasilit
Ishte kërkesë e natyrshme që të informohej kryetari i grupit parlamentar për negociatat, ecurinë dhe kjo gjë është bërë prej meje në ditët në vijim pas kërkesës dhe sot që po flasim.
Është anashkaluar Komisioni dhe Kuvendi nga negociatat?
Xhafaj: Nuk është e vërtetë, unë që jam kryetar Komisioni dhe përfaqësues i partisë politike njoh deri në detaje çdo propozim që i kalohet PD.Komisioni është duke funksionuar normalisht, zoti Bylykbashi do bënte mirë të vinte në Komision të ligjeve të ushtronte detyrat dhe përgjegjësitë e tij parlamentare. Por nëse nuk është i kënaqur me këtë që po bën mund të vazhdojë të dalë në selinë e PD dhe të bëjë politikë nga selia e PD.
Pse ndihet LSI e anashkaluar?
Xhafaj: Nuk ndihet e anashkaluar LSI. Zoti Vasili është anëtar i komisionit të Posaçëm Parlamentar dhe përkundër asaj që thatë ju, Vasili është i pranishëm në çdo mbledhje të Komisionit, bën pyetje, bën vlerësime.Është një ndër anëtarër më aktiv të Komisionit. Sa i përket çështjes që lidhet me negociatat ishte çështja e njohjes më mirë në detaje në mënyrë që ai të kishte mundësi të informonte grupin e tij parlamentar. Jemi takuar me zotin Vasili, i kemi sqaruar të gjithë këtë aspekt të veçantë, flasim për një komponent të proçesit dhe zhvillohet jashtë Komisionit Parlamentar sepse nuk është negociatë që bëhet në mbledhjen e Komisionit, por ndërmjet PD dhe PS për të negociuar një çështje të vetme.Ne kemi dhënë jo një mundësi, jo një propozim për negociuar dhe marrë konsensusin e PD por katër të tilla me shkrim, 3 nga të cilat janë në dakortësi të plotë me partnerët ndërkombëtarë, përfshirë dhe këtë që është duke u diskutuar.
