Deputeti Edi Paloka, anëtar i Komisionit të Rithemelimit, përmes një postimi në rrjetet sociale, shprehet se Lulyim Basha është peng, ndaj nuk e jep dot dorëheqjen. Paloka ironizon deklaratat e fundit të Bashës, duke thënë se ai po tregohet i sinqertë kur thotë se nuk ka humbur asnjëherë, pasi pasuritë e tij janë shtuar.
“Sinqeriteti i L.B. Dy herë, me dy deklarata të tij së fundmi, L.B është treguar vërtetë i sinqertë! Deklaroi se “nuk ka humbur asnjëherë”! Shumë e vërtetë, ai nuk ka humbur asnjëherë, përkundrazi pas çdo humbjeje të PD atij i janë shtuar pasuritë. Ata që kanë humbur kanë qenë demokratët. Tani deklaron se është gati të bëj çdo gjë që ka në dorë, por jo dorëheqjen që i kërkon grupi i tij. Kjo për arsyen e thjeshtë se dorëheqjen nuk e ka në dore ai, po ata që e mbajnë peng! Por as PD as demokratet nuk mund të mbeten peng i tij. Tani rruga për tu ndjekur dihet. Secili bën zgjedhjen e tij” – shkruan Paloka.
