“Më lehtësisht gjen memoriale për ushtarët pushtues grekë sesa për mijëra viktima shqiptare. I bëjmë thirrje shtetit shqiptar që përveç memorialit, të këmbëngulë që shteti grek të kërkojë zyrtarisht ndjesë.”
PDIU i bën thirrje qeverisë të marrë vendimin për ngritjen e memorialit në kujtim të viktimave të masakrës së Panaritit dhe Hormovës. Përmes një deklarate për mediat, PDIU njofton se sot u përkujtua 102 vjetori i kësaj masakre të forcave shtetërore greke ndaj popullsive së jugut të Shqipërisë. PDIU sjell në vëmëndje memorialet për ushtarët grekë në tokën shqiptare ndërkohë që shteti shqiptar nuk kërkon të njëjtën gjë për viktimat shqiptare në tokën greke dhe më keq akoma, nuk ngre memorial në tokën shqiptare për viktimat e masakrave të shtetit grek ndaj qytetarëve shqiptarë.
Deklarata
Partia Drejtësi, Integrim dhe Unitet përkujton 102 vjetorin e Masakrës së Panaritit dhe të Hormovës, një ndër aktet më tragjike të Luftës së Parë Botërore, që shkaktoi vrasjen e mijra shqiptarëve, gra pleq e fëmijë nga forcat shoviniste greke. Masakrat e forcave shtetërore greke ndaj popullsive të jugut të Shqipërisë do të kulmonte me genocidin mbi shqiptarët e Çamërisë 30 vite më vonë. Këto akte të orkestruara për zhdukjen e shqiptarëve nga trevat e tyre fatkeqësisht nuk i përkasin vetëm historisë. Sot, më lehtësisht gjen memoriale për ushtarët pushtues grekë sesa për mijra viktima shqiptare. PDIU i bën thirrje shtetit shqiptar te ngrejë memoriale që kujtesa historike të bëjë që akte të tilla të mos përsëriten dhe të kërkojë që shteti grek të kërkojë zyrtarisht ndjesë.
