Ministri i Mbrojtjes në Shqipëri, Niko Peleshi, ka reaguar sot për tensionet në Ukrainë. Duke folur nga foltorja e Kuvendit ai tha se Shqipëria e dënon aktin e Rusisë dhe se do të japë kontributin e saj real në NATO.
“Raportohen humbje jete. E dënojmë me forcë sulmin e pajustifikuar të Rusisë ndaj Ukrainës. Jemi të bashkuar në NATO në këtë luftë vlerash, Shqipëria do të vazhdojë që të japë kontributin e saj real në NATO. Dëshiroj të risjellë se kushdo shqiptarë që është i interesuar për paqen në rajon në Shqipëri dhe Kosovë duhet të unifikohet në një qëndrim të përbashkët.
Qëndrimi i Shqipërisë duhet të unifikohet me NATO-n dhe me BE. Rezolutat nuk janë në të mirë të dinjitetit tonë, nuk shikoj rezoluta parlamentare. Nuk është praktikë e panjohur, por po flasin qeveritë në emër të qeverive të tyre. Ne jemi më të bashkuar se kurrë. Mos e përdorni për agjenda politike”, tha Peleshi.
Kujtojmë se pak më parë edhe zyrtarë të tjerë të politikës shqiptare kanë folur me të njëjtën gjuhë, duke thënë se Shqipëria do të jetë në krah të Ukrainës.
