Kryedemokrati Lulzim Basha ndodhet në Durrës ku ka prezantuar kandidatin për kryebashkiak në zgjedhjet e 6 Marsit, Luan Hoti.
Kreu i Partisë Demokratike, Lulzim Basha, i është përgjigjur në mënyrë të tërthortë akuzave të ish-kryeministrit Sali Berisha në lidhje me akuzat se bashkë me Ramën kanë bërë pakt për portin e Durrësit. Basha u shpreh se kjo është një gënjeshtër e pastër duke shtuar se demokratët janë të prerë për të kërkuar transparencë për të gjitha investimet në këtë port.
“Projekti i portit të Durrësit. Një nga arsyet kryesore pse sharlatanët ecin para në politikë është se i bëjnë njerëzit të mos mendojnë. I ushqejnë si fëmijët në çerdhe. Merre, merre. Nuk logjikojnë. Është ngritur një gënjeshtër sikur unë dhe Rama kemi pakt për portin e Durrësit. Kjo është një gënjeshtër e pastër. Ne kemi qëndruar të prerë për transparencë. Ne duam të shohim shumë para të investohen. Por ka një ndryshim miqtë e mi. Do ta përmbledh me diçka që e kam përjetuar vetë. PD është pro zhvillimit që nuk dëmton asetet shekullore të Durrësit. Që të bëhet kjo, nuk duhet sjellë një sheik. Thanë do sjellin një sheik për të bërë kullën Al Habibi, Ka përplasje të banorëve me FNSH që duan t’i prishin shtëpitë. Kjo nuk është tokë pa Zot”, deklaroi Basha.
Ndalur te kandidati Luan Hoti, Basha u shpreh se ai nuk ka nevojë për prezantim pasi vjen nga Durrësi, duke shtuar se ky qytet është shumë i rëndësishëm për Shqipërinë.
