Agjencia evropiane për bashkëpunim të zbatimit të ligjit (Europol) në bashkëpunim edhe me FBI-në amerikane ka goditur një rrjet trafikimi të kokainës në Evropë, që u përkiste shqiptarëve, ku në pranga kanë rënë 45 persona, shumica prej të cilëve shqiptarë.
Mediat spanjolle, shkruajnë se Policia Kombëtare e Spanjës ka gjetur aktivitete të shumta në ishullin e Mallorcas, ku kjo organizatë kriminale e trafikimit të drogës nga Amerika Latine, pastronte paratë.
Sipas Europol, anëtarët e rrjetit kriminal kanë udhëtuar rregullisht në Dubai, Meksikë dhe Kolumbi për të aranzhuar biznesin e tyre ilegal, duke shfrytëzuar pajisje të koduara për komunikim për të koordinuar aktivitetet.
Për momentin, dislokimi i policisë është kryer në kompleksin industrial Can Valero, në Llotja de Palma, në zonën e s’Aigua Dolça, në Passeig Marítim dhe në Rafal. Në një adresë të regjistruar në këtë lagje të fundit është marrë në pyetje një kontabilist, që dyshohet se ka lidhje me organizatën. Deri më tani janë bërë 8 arrestime.
Kujtojmë se njëkohësisht, në qytete të tjera evropiane janë kryer kontrolle dhe arrestime ndaj kësaj organizate ndërkombëtare që ka lëvizur shuma të mëdha parash vitet e fundit në gjysmën e botës.
