ISHTI ka kapur në shkelje një sërë pikash karburanti në këtë fillimviti. Nga të dhënat e publikuara bëhet me dije se vetëm në muajin janar janë gjobitur nga Inspektorati Shtetëror Teknik dhe Industrale, 7 subjekte të tregtimit me shumicë dhe pakicë të karburanteve dhe të lëndëve djegëse, pajisjeve nën presion dhe instalimeve. Ndërsa theksohet se vlera totale e masave administrative arrin 2. 050. 000 lekë. Ushtrim i veprimtarisë e tij jo në përputhje me kërkesat ligjore dhe teknike, mungesë të dokumentacionit tekniko-ligjor në stacionin e shitjes së karburantit, mungesë dokumentacioni lidhur me kontratat e furnizimi apo mungesa projekteve teknike, janë disa prej shkeljeve të konstatuara nga ky dikaster.
Ndërkaq, bëhet me dije se për vitin 2021 në total ky dikaster penalizoi 69 subjekte, me një vlerë totale gjobash prej 29,16 mln lekë. Shumë prej subjekteve janë penalizuar, pasi nuk kanë plotësuar në kohë detyrat e lëna nga inpektorët, ndonëse aksidentet që shpesh herë janë shoqëruar me humbje jetësh, nuk kanë munguar. Ndërkaq, pjesë e penalizimeve me gjobë janë edhe subjektet që tregtojnë karburant jashtë normave të lejuara, pasi konstatohet se ka shmangie në parametrat cilësorë për produktin Gaz i lëngshëm, për përdorim për qëllim rezidencial apo karburante me squfur tej normave të lejuara.
Megjithatë, pavarësisht gjobitjeve të herë pas hershme, ku ISHTI duket se ka hasur vështirësi në mbledhjen e të gjitha detyrimeve nga subjektet. Vitin e kaluar ky dikaster publikoi listën e debitorëve, duke filluar nga vitit 2007 e deri në vitin 2020, duke renditur të gjithë subjektet publikë, privatë apo individë, të cilët nuk kanë likujduar detyrimet e që për pasojë rezutojnë borxhlinj ndaj këtij institucioni. Vlera totale e këtyre detyrimeve arrinte në 127.6 mln, ndërkohë që 2020-a është viti me detyrimin më të lartë të papaguar, me 29.8 mln lekë, ndërkohë që pas tij vjen viti 2015 me 18.9 mln lekë.
