Është zbuluar shkaku i sherrit mes dy vajzave në Qytet Studenti, ku për pak se nuk përfundoi me viktima. Mësohet se e gjitha ndodhi për një djalë. Një 20-vjeçare u godit disa herë më thikë nga një 18-vjeçare duke përfunduar në spital, ndërsa policia ka shpallur në kërkim këtë të fundit me akuzën e plagosjes me dashje.
Ngjarja ka ndodhur mbrëmë në orën 21:30 në zonën e “Qytetit Studenti” ku 18-vjeçarja Martina Z. ka qëlluar disa herë me thikë 20-vjeçaren Aurora G. duke i shkaktuar plagë në dorë dhe pjesën e poshtme të trupit.
Për fat të mirë, plagët nuk kanë qenë të rënda për Aurorën, e cila ndodhet në spital jashtë rrezikut për jetën. Burimet bëjnë me dije se shkak për sherrin ka qenë lidhja me një djalë. Ky i fundit ishte fillimisht në një raport me njërën nga vajzat dhe më pas me tjetrën, gjë që ka shkaktuar sipas policisë edhe sherrin mes të rejave.
