Puka u godit më fortë nga tërmeti 4.8 ballë mbrëmjen e kaluar dhe si pasojë ka marrë më shumë dëmtime. Rreth kësaj çështje ka folur sot kryetari i Bashkisë së Pukës, Gjon Gjonaj, i cili tha se dëme ka pasur në pallate, por edhe në godinat e institucioneve publike, përfshirë spitalin e qytetit.
Sipas tij, paraprakisht dëmet nga tërmeti vlerësohen rreth 3 milionë euro, e cila është një faturë e papërballueshme për pushtetin lokal.
“Tërmeti i mbrëmjes së djeshme, që i shkallës relativisht të rrezikshme, e gjithë popullata doli në shesh, shumë orë qytetarët nuk u kthyen në banesa, kishte dëme materiale të konsiderueshme.
Dëmtime në banesa, pothuajse ka në të gjitha ndërtesat e vjetra, kemi pasur dëmtime edhe në fshatra, që kanë qenë të vjetra. Duhet të gjejmë mundësinë për të larguar panikun te njerëzit, ne do të bëjmë të pamundurën që të ndërhyjmë në rikonstruksionin e banesave, përfshirë edhe oxhaqet.Ne e kemi të pamundur që të përballojmë ekonomikisht pasojat e këtyre dëmeve, që mund të shkojnë deri në 3 milionë euro”, tha ai.
Sakaq, raportohet se dëme të shumta ka pasur në Kukës dhe në Fush-Arrëz, ku janë shkatërruar me dhjetëra banesa.
