Deputeti i Partisë Demokratike, Belind Këlliçi ka reaguar pas vendimeve të Kryesisë për përjashtimet dhe pezullimet e disa prej figurave mjaft aktive në PD, përfshirë ish-kryeministrin Sali Berisha.
I rreshtuar që prej shtatorit me Berishën, Këlliçi në një postim në rrjetet sociale, sfidon Bashën duke i kërkuar të zbresë në bazë, ndërsa ironizon që ende s’ka të internuar dhe pushkatuar.
“Ish kryetari i partisë që blindoi humbjen në PD, nga xhelozia se nuk u bë dot lider, i rezistoi gjumit deri në të gdhirë të ditës së sotme për të përjashtuar e pezulluar në grup kritikët e tij. Çudi që s’ka ende të internuar apo pushkatuar! Zbrit në bazë dhe shiko si do të të presin. Ne kemi zgjedhur demokratët e bazës dhe ata të sakrificave, kurse ti Edi Ramën dhe bashkëqeverisjen!”, shkruan Këlliçi.
Në mbledhjen maratonë të Kryesisë që zgjati deri në orët e para të mëngjesit të sotëm, u vendos përjashtimi përgjithmonë nga PD i Sali Berishës dhe 7 prej mbështetësve të tij më të afërt.
