Deputetja e Partisë Demokratike, Albana Vokshi ka reaguar pas vendimit të kryesisë për ta përjashtuar përfundimisht atë dhe 7 anëtarë të tjerë, përshirë ish-kryeministrin Sali Berisha nga PD.
Vokshi është shprehur se nuk mund ta përjashtojë nga PD dikush që sipas saj nuk ka lidhje me atë parti, por e përdorin vetëm për pasurim personal.
“Nga PD nuk më përjashtojnë dot ata që nuk kanë lidhje me PD-në. Nga PD nuk më përjashton dot një grup uzurpatorësh që PD-në e kanë mjet për pasurimin personal, ndaj e duan me çdo kusht. Ata nuk kanë lidhje as me demokratët as me demokracinë. I vetmi organ legjitim në Partinë Demokratike, mandatuar nga Kuvendi Kombëtar i 11 dhjetor 2022, është Komisioni i Rithemelimit të PD në të cilin unë jam anëtare. Lulzim Basha është shkarkuar me 4446 vota të delegatëve legjitim të Kuvendit Kombëtar të PD, vendim ky i ratifikuar në mënyrë unanime nga rreth 44 mijë anëtarë të PD në referendumin e dt 18 dhjetor 2022”, shprehet Vokshi.
Gjatë mbledhjes së kryesisë së PD që zgjati deri në orën 03:30 të mëngjesit të sotëm, u vendos përjashtimi përfundimisht i 7 anëtarëve të PD, përfshirë ish-kryeministrin Sali Berisha.
