Partia Demokratike ka reaguar zyrtarisht pas vendimit të kryesisë për të përjashtuar përfundimisht nga PD ish-kryeministrin Sali Berisha dhe 7 nga mbështetësit e tij.
Në deklaratën e PD-së, thuhet se ky vendim është marrë pas protestës së 8 Janarit, ku si pasojë e dhunës nga përkrahësit e Berishës, u vu në rrezik, jeta e anëtarëve të kryesisë, grupit parlamentar, Këshillit dhe Kuvendit Kombëtar, si dhe e vetë protestuesve.
Ndër të tjera, në reagim thuhet se asnjë prej personave që janë përjashtuar nuk u distancua nga aktet e dhunës, që sipas Bashës u krye nga persona me rekorde kriminale dhe se qëllimi i Berishës ishte gjakderdhja.
Vendimi për përjashtimin është marrë në orët e para të mëngjesit të sotëm, në mbledhjen e kryesisë që nisi rreth orës 18:30 dhe ka përfunduar rreth orës 03:30 të mëngjesit.
Anëtarët që janë përjashtuar përfundimisht janë: Bujar Nishani, Flamur Noka, Albana Vokshi, Edmond Spaho, Arben Ristani, Klevis Balliu, Keltis Kruja.
Ndërkohë që për mbështetësit e tjerë të Berishës, kryesia ka vendosur që ata të qëndrojnë të pezulluar. Në mesin e atyre që janë pezulluar janë Agron Shehaj, Belind Këlliçi, Ledina Mandija, Tritan Shehu, Aldo Bumçi, Çlirim Gjata, Edith Harxhi, Edi Paloka, Luan Baçi, Oerd Bylykbashi, Lorenc Luka, Ivi Kaso, Mimoza Hajdarmataj, Genc Pollo, Genc Deromemaj, Eno Bozdo, Ervin Minallori, Rigers Muçollari dhe Bledi Himçi.
Pritet që ky vendim i kryesisë të kalojë më pas për miratim në Këshillin Kombëtar të Partisë Demokratike. Mbledhja e djeshme e Kryesisë së PD-së u zhvillua nën masa ”të rrepta”, ku Lulzim Basha iu kërkoi të gjithë të pranishmëve që të hiqnin telefonat në mënyrë që të mos kishte rrjedhje jashtë të informacioneve.
