Kryetari i Bashkisë së Tiranës, Erion Veliaj, u ka bërë thirrje të rinjve që të ndjekin sportin, të ushtrojnë sa më tepër aktivitet fizik në mënyrë që të evitojnë mbipeshën. “Tirana Fan Zonë” është një hapësirë e krijuar për të gjithë qytetarët të cilët kanë mundësi ta shfrytëzojnë jo vetëm për të ndjekur ndeshjet por edhe për t’u argëtuar. Bashkia e Tiranës, në bashkëpunim me federatat e ndryshme të sportit, ka krijuar terrene të posaçme për zhvillimin e sporteve si futbolli, basketbolli, volejbolli, karate, taekuondo.
Veliaj: Nuk e fshehim se duhet të përdorim këtë eksperiencë fantastike të Kombëtares tonë në Francë dhe kualifikimin, si një mundësi për të inkurajuar jetën sportive në qytet. Besoj që gjithë ky admirim për sportistët e Kombëtares duhet të kthehet në vendim-marrje të përditshme që ne duhet ta kemi në këtë qytet për të inkurajuar fëmijët të merren me sport. Ndaj, edhe e kemi kombinuar, nuk kemi vetëm pjesën e tifozërisë për të ndjekur ndeshjen, por edhe pjesën sportive me disa fusha.”
Kryebashkiaku ka vazhduar më tej: “Më vjen mirë që sot kemi ekipe nga Durrësi, Elbasani, ekipet e vajzave të Miss Shqipërisë, janë gjithashtu duke përdorur fushat, kemi bërë rezervime gjatë gjithë muajit dhe i them të gjithë prindërve të Tiranës, nëse doni të bëni një gjë të mirë për fëmijët tuaj inkurajoni një jetë të shëndetshme, të ushqehen mirë, të ushqehen me një kulturë e cila fokusohet tek ushqimet bio, në një qytet që sot është më obez dhe më i pashëndetshëm se kurrë më parë. Në qoftë se duan që realisht t’i lënë fëmijëve të tyre një jetë solide është që t’i inkurajojnë që të merren me sport”.
