Kryeministri Edi Rama teksa kujtoi se sateliti i parë do të hidhet në muajin mars, theksoi se përmes tyre Policia e Shtetit do të marrë çdo ditë të dhëna për abuzime të ndryshme.
Rama tha se kjo çështje u shoqërua me humor dhe të qeshura, ndërsa shtoi se nuk është aspak keq që njerëzit edhe të qeshin.
“Për herë të parë në RSH do të kemi një monitorim në kohë reale të trafikut, është ndërtuar qëndra e kontrollit kombëtar të rrugëve në Republkën e Shqipërisë, dhe në një proces që vazhdon po punohet për vendosjen e sistemit të kamerave inteligjente, që do të heqë përfundimisht nga akset kombëtare patrullat. Do ta vendosë policinë në funksion të reagimit bazuar mbi faktet, do të jetë një kapërcim i madh për mirëqeverisjen e territorit, do të jetë kapërcim i madh dhe për zhdukjen përfundimtare të rryshfetit. Ju keni dëgjuar me siguri për satelitët, keni parë dhe shumë gallatë që është bërë, nuk është aspak gjë e keqe që njerëzit të qeshin, me satelitët që ne do të hedhim, do të kemi të dhëna në kohë reale përditë, policia do të ketë përditë të dhëna mbi ndërtimet pa leje, dhe nuk do të jetë më e varur nga sa mirë e bëjnë punën në terren punonjësit e policisë, që për fat të keq i kanë sytë hapur katër kur i bjenë në qafë ndonjë familje, dhe i kanë të mbyllur kur iu hidhet zhavor plazheve të Shqipërisë.
Çështja e mbetjeve do të jetë një tjetër që do të monitorohet çdo ditë, është e patolerueshme që në pyllin e sodës të mbushet një sipërfaqe me 3 mijë metra katrorë me zhavor, që venë e vinë nga qendra e qytetit dhe policia as të mos shohë dhe as të mos dëgjojë asgjë. Drejtuesit e policisë ta lexojnë nen për nen çfarë është miratuar nga Kuvendi, janë krime që policia është përgjegjëse, dhe se goditja e ligjit është rënduar maksimalisht. Nuk është më ligji, që kur ti kapesh duke mbushur pyllin me zhavor, merr një gjobë, nëse ti kapesh arrestohesh. E njëjta gjë vlen dhe për ndërtimet pa leje.”, tha Rama.
