Ministri i Transporteve, Edmond Haxhinasto është vënë në pozitë të vështirë gjatë interpelancës për ndërtimin e Rrugës së Arbrit.
I thirrur për t’u pyetur nga deputetja e PDIU-së, Mesila Doda ai ka justifikuar sërish vonesat, kurse deputetja i ka bërë me dije se shtetarë të tillë as do e ndërtojnë, as kanë ndërmend në të ardhmen ta ndërtojnë Rrugën e Arbrit, por thjesht e shtyjnë nga viti në vit, megjithëse kjo vepër nuk është punë kalamajsh.
Haxhinasto nuk e ka fshehur nervozizmin derisa ka thyer dhe rregullat e zhvillimit të një interpelance parlamentare. Ai ka thënë:
“Janë 5 oferta nga kompani kineze dhe një nga kompani shqiptare, pritet dhe një e gjashtë nga kompania kineze”, tha sot ministri i Transporteve, Edmond Haxhinasto, në interpelancën me deputeten e PDIU-së, Mesila Doda.
Në përgjigje të pyetjeve të Dodës, ministri Haxhinasto, u shpreh se qeveria e shkuar la një projekt përgjysëm. Sipas tij, projektit i mungonin 6 kilometra, të cilat qeveria sot i ka zgjidhur me një marrëveshje të arritur me Maqedoninë. “6 kilometra që mungonin ishin pjesa e fundore e kufirit shqiptaro-maqedonas. Ata nuk pranonin që kjo rrugë të bëhej pasi përkonte me zonën e tyre të mbrojtur, por ne insistuam dhe arritëm marrëveshjen”, tha Haxhinasto.
Deputetja Doda kujtoi gjatë fjalës së saj se çdo qeveri që ka qenë në pushtet ka premtuar se do të ndërtohet Rruga e Arbrit. Ligjvënësja theksoi se Rruga e Arbrit behet me njerëz seriozë.
“Çdo qeveri premton Rrugën e Arbrit. Rruga e Arbrit bëhet me njerëz seriozë. Flitet për Rrugën e Arbrit, por ajo nuk ekziston”, tha Doda.
Më herët, deputetja Doda njoftoi se në seancën e sotme do të zhvillonte një interpelancë me ministrin Haxhinasto lidhur me ecurinë e Rrugës së Arbrit. Përmes një postimi në rrjetet sociale, Doda listoi pyetjet e drejtuara në kërkesë Haxhinastos.
Në kërkesën e deputetes Doda janë parashtruar këto kërkesa:
- A do e ndërtoni Rrugën e Arbrit?
- A do e ndërtoni brenda këtij mandati Rrugën e Arbrit?
- Sa fonde janë dhënë deri tani për Rrugën e Arbrit? A është zgjidhur çështja e financimit të kësaj rruge?
- Ku ka ngecur realizimi i projektit dhe si mendohet që të zgjidhet?
- Sa është dëmi që pësojnë çdo vit banorët e zonës për mospërfundimin e infrastrukturës?
- Sa do e shkurtonte distancën e sotme ndërtimi i Rrugës së Arbrit?
- Edhe sa kohë do të duhet për të përfunduar Rruga e Arbrit?
- Ku jeni me premtimet e fushatës elektorale dhe programin e qeverisë lidhur me këtë çështje?
https://www.youtube.com/watch?v=Y8GI2V98klg&feature=youtu.be
