Ditën e sotme qytetarët në Durrës kanë dalë në protestë pasi gjykata e Durrësit u rrëzoi kërkesën për pezullimin e punimeve të një objekti 6-katësh që po ndërtohet pranë pallatit të tyre. Ata shprehen se firma duhet të kishte ndaluar punimet pasi po prek gjendjen e objektit në të cilin po jetojnë.
Sipas banorëve, prej kohësh askush nuk i dëgjon ankesat e tyre lidhur me pallatin që po ndërtohet.
“Sot kemi ardhur një pjesë e banorëve sepse një pjesë mesa duket u kanë bërë presion institucionet ose firma nuk e di dhe janë tërhequr me justifikime të ndryshme. Kemi ardhur të protestojmë se gjykata dhe prokuroria na ka lënë në heshtje. Kishim dje vendimin që do të pezullonte punimet e firmës, momentalisht do të bëhet dhe një rishqyrtimi i lejes. Zonja ka marr lekët mesa duket, nuk pinë ujë fare ato letra që ne kemi marrë nga të gjithë institucionet dhe tha që rrëzohet kërkesa juaj”, tha një banor.
“Nga bashkia kërkojmë që të vijnë dhe të shohin gjendjen e pallatit, të ndalojnë punimet e objektit që po ndërtohet aty”, shprehet një tjetër.
