Në një njoftim që u bë në takimin e Asamblesë së Përgjithshme të mbajtur mbi SIDA-n në Nju Jork u deklarua se Kombet e Bashkuara do t’i shtojnë përpjekjet e tyre për të luftuar virusin e HIV-it dhe sëmundjen e shkaktuar prej tij. Qëllimi është që brenda vitit 2030 ky virus dhe sëmundja e shkaktuar prej tij të shuhen.
Ajo që njihet si deklarata politike për HIV-in dhe SIDA-n synon fundin e sëmundjes epidemike brenda 15 vitesh e përfshin edhe plane për ta ulur numrin e vdekjeve prej saj në më pak se 500.000 brenda vitit 2020. Gjithashtu, deklarata parashikon përpjekje për zhdukjen e diskriminimit ndaj personave të infektuar dhe mbrojtjen e të drejtave e dinjitetit të tyre.
Sipas Sekretarit të Përgjithshëm të OKB-së, Ban Ki-moon, në luftën kundër sëmundjes së tmerrshme është shënuar një progres gjigand.
Ban Ki-Moon shpreh gjithashtu se “Reagimi ndaj SIDA-s është burim frymëzimi dhe risie, pasi dëshmon se çfarë ndikimi mund të kenë shkenca, aktivizimi i komunitetit, lidershipi politik, pasioni dhe dhembshuria për tjetrin kur bashkohen të gjitha bashkë”.
Kanë rënë me 35% numri i rasteve të reja që nga 2010, ai i vdekjeve me 43% nga 2003 dhe gjatë gjatë 15 viteve të fundit niveli i infektimit të fëmijëve është zvogëluar me 56%.
