Kryeministri i Kosovës, Albin Kurti do dalë ditën e sotme në një konferencë për mediat në orën 10:00. Kjo dalje për mediat, vjen pak orë pas marrjes së kërcënimit për jetën dhe mbrojtjen nga siguria e shtetit.
Konferenca do të jetë e përbashkët me Ministrin e Financave, Punës dhe Transfereve, Hekuran Murati. Zyra për shtyp e Kurtit, ka bërë me dije se në këtë konferencë, ata do të flasin për operacionalizimin e masës 2.1-Subvencionimi i Kredive Investive – dhe masës 2.4 – Mbështetje e eksportit- të Pakos së Ringjalljes Ekonomike. Mirëpo pritet që kryeministrit ti bëhen pyetje dhe për kërcënimin që mori ditën e djeshme.
“Kryeministri Albin Kurti, bashkë me Ministrin e Financave, Punës dhe Transfereve, Hekuran Murati, mbajnë konferencë për media, në lidhje me operacionalizimin e masës 2.1-Subvencionimi i Kredive Investive – dhe masës 2.4 – Mbështetje e eksportit- të Pakos së Ringjalljes Ekonomike”, thuhet në njoftim.
Ditën e djeshme u bë publike në media se kryeministri i Kosovës, Albin Kurti ishte kërcënuar për jetën. Në media qarkulloi një foto, në të cilën thuhej se kushdo që do vrasë Kurtin do të marrë si shpërblim 50 mijë euro. Nuk dihet saktë nëse ky ishte kërcënimi që bëri që forcat e sigurisë të ruanin banesën e Kurtit.
