Partia Demokratike denoncon keqmenaxhim dhe problematika të mbartura në fillimin e vitit shkollor.
Deputetja e PD, Ina Zhupa kritikon masat e qeverisë për të parandaluar pandeminë në bankat e shkollës.
“Masat covidiane që ka nxjerr qeveria janë: Vaksinim për mësuesit ose testin më të shtrenjtë PCR çdo javë, dy orë mësim për nxënësit dhe të detyruar të mbajnë maska! Masa ekstreme që nuk shkojnë as në përputhje me njëra tjetrën, në një vend ku shteti nuk merr asnjë masë për situatën por gjithë barrën e kanë mësuesit-prindërit-nxënësit”.
Problematikat e denoncuara nga partia opozitare përmblidhen në disa pyetje që shtron deputetja Zhupa. “Pse duhet bërë mësim i shkurtuar kur mësuesit janë o të vaksinuar o me test PCR dhe nxënësit me maska? Pse nuk janë marr masat higjieno-sanitare për ujë të rrjedhshëm në të gjitha shkollat? Pse nuk janë marr masat për dezinfektimin të vazhdueshëm profesional të shkollave? Pse nuk janë marr masat për ndihmë financiare mësuesve për përballimin e covid, apo teste të shpejta falas që mos detyrohen të bëjnë PCR?
Përtej pandemisë, sipas opozitës nuk janë zgjidhur as problematikat e mbartura, si amortizimi i shkollave, distanca e largët e tyre nga disa qendra të banuara, klasat kolektive por edhe tekstet shkollore “aspak cilësore”.
