Këngëtari serbo-kroat, i cili akuzohet rëndom se ka nxitur me këngët e tij masakrat e serbëve në Kosovë, do të mbajë një koncert në Shqipëri, ku për shkak të këtij lajmi ka trazuar opinionin publik. Janë shqiptarët përtej kufirit, ata që kanë humbur të afërmit në luftën e Kosovës, të cilët në një letër të përbashkët lusin Bashkinë e Korçës të anulojë koncertin e Goran Bregoviç tek festa e përvitshme e birrës.
Festa e Birrës, këtë vit do të organizohet tek Terminali i ri i Autobusëve, në hyrje të qytetit të Korçës nga 18 deri më 22 gusht.
Në shkurt të këtij viti, Goran Bregoviç është dekoruar me urdhërin më të lartë të Serbisë për merita të jashtëzakonshme në përfaqësimin e Republikës së Serbisë.
Kujtojmë se Edi Rama si kryetar bashkie i Tiranës i dha në vitin 2006 artistit Goran Bregoviç titullin “Çelësi i Qytetit”.
Të gjithë artistët e ftuar nga Kosova për të performuar në “Festën e Birrës” kanë refuzuar të jenë në këtë festival për shkak të këngëtarit Goran Bregoviç, për të cilin pretendohet se ka frymëzuar ushtarët serb gjatë luftës në Kosovë.
Capital T, Dafina Zeqiri, Dren Abazi e shumë artistë të tjerë janë ndër emrat e këngëtarëve të Kosovës që u tërhoqën nga “Festa e Birrës”, teksa këtë gjë nuk e kanë bërë këngëtarët shqiptarë, të cilët do dalin të këndojnë në të njëjtën skenë ku do këndojë dhe Goran Bregoviç.
