Bashkia e Tiranës nisi sot fushatën “Fuqia e 1 vote”, për bilancin e punëve të kryera në harkun e një viti nga zgjedhjet e shkuara lokale. Takimi i parë i është kushtuar punës së bërë për rikonstruksionin e plotë të 31 çerdheve dhe 23 kopshteve të Tiranës, të cilat iu shërbejnë rreth 5 mijë fëmijëve. Në fjalën e tij, kryetari i Bashkisë së Tiranës, Erion Veliaj, theksoi se ka qenë përgjegjësi e administratës bashkiake, që votën dhe besimin që i dhanë qytetarët një vit më parë, ta përkthente në punë konkrete për të mirën e qytetit.
Veliaj: Vendimi për t’i vënë ato pak fonde që kishim në funksion të punës për fëmijët ishte një vendim që u shpërblye, dhe falë këtij kontributi sot kemi çerdhe dhe kopshte publike shumë herë më të mira se privatët. Sigurisht, në çmim, por edhe në cilësinë e shërbimit që ofrojmë për fëmijët tanë. Kryebashkiaku i Tiranës u ndal edhe te puna që bashkia ka realizuar për më të vegjlit e qytetit për më shumë ambiente argëtuese për ta, siç ishte edhe këndi i lojërave te Parku i Liqenit, që u përurua para disa ditësh.Po ashtu ai i kujtoi kompanive që që do të marrin leje ndërtimi në Tiranë, të kontribuojnë në krijimin e ambienteve të reja për çerdhe e kopshte. Veliaj: Pas hapjes së këndit të lojërave për të cilin u bë shumë debat, më vjen mirë që teksa flasim është kthyer në mizë lisi. Më vjen mirë, po ashtu, që shumë sipërmarrës janë ofruar të kontribuojnë për një kënd lojërash të ngjashëm edhe këtu te fusha e aviacionit, që edhe në lagje të tjera të kemi hapësira ku jo çdo njeri do të duhet të shkojë tek Liqeni i Tiranës. Jemi shumë pranë përfundimit të këndit të lojërave te ‘Mine Peza’, po vijojmë te Materniteti i Ri. Të gjitha lejet e reja të ndërtimit të jepen me kusht për një institucion arsimor; pra, nëse do të bësh një pallat, një kat apo x metra katrorë do t’ia japësh bashkisë për çerdhe e kopshte.
