Kandidatja e Partisë Demokratike në Tiranë, Jorida Tabaku, zhvilloi sot një takim në Sauk, prej ku tha se banorët e kësaj zone janë rreshtuar në krah të PD.
Në një takim me qytetarët, Tabaku tha se banorët e kësaj njësie e kanë vuajtur për 8 vjet me radhë mbi kurriz keqqeverisjen dhe e kanë kuptuar se kjo qeveri i ka mashtruar për qëllime elektorale, ndërsa nga ana tjetër i kanë besuar programit të Partisë Demokratike.
Tabaku tha se një qeveri që punon për të gjithë është e vetmja mënyrë për të kthyer shpresën në një vend, ku një grup njerëzish u kanë vjedhur qytetarëve të sotmen dhe të ardhmen.
“Në 25 prill unë u kërkoj vetëm diçka, numrin 9, numri 9 për taksën e sheshtë 9 përqind, numri 9 për paga më të larta, për pensione më të larta, numri 9 për infrastrukturë, për rininë është më e rëndësishmja që ta mbajmë këtu, numri 9 për gratë e zonjat, numrin 9 për më shumë arsim, më shumë shëndetësi, numri 9 për familjet tuaja, numrin 9 që Shqipëria më në fund të përfundojë tranzicionin e të shkojë drejt një modeli, që ne e kemi nisur në 2005, po fatkeqësisht nuk e përfunduam dot, modelin e Integrimit Europian. Më 25 prill mos votoni për askënd, për asnjë politikan, por votoni për xhepin tuaj, për familjen tuaj. Ky është qëllimi i kryeministrit të ardhshëm zotit Basha, ky është qëllimi i Partisë Demokratike, ky është qëllimi që ne do kemi çdo ditë të qeverisjes. Ka ardhur koha që Shqipëria të ndryshojë, prandaj dua t’u kërkoj edhe diçka të fundit.
Nuk ka nevojë as për gënjeshtra, as për propagandë, nuk ka nevojë as për fjalë shumë, ka nevojë për një qeveri që punon për njerëzit dhe ne do ta ofrojmë këtë model pas 25 prillit. Prandaj të përdorim çdo orë, çdo minutë që deri më 25 prill ne t’i kërkojmë votën kujtdo. T’ia shtrijmë dorën kujtdo, për qeverinë e ndryshimit, për qeverinë që do sjellë ndryshimin ashtu siç e solli në 92. Shumë faleminderit dhe fitore!”, përfundoi kandidatja e PD.
