Kryeministri Edi Rama ka reaguar ditën e sotme nga Shkodra për deklaratën e Dom Gjergj Metës kundër shitblerjes së votës.
Rama tha se është dakord që të shesësh votën është mëkat, por ai shtoi se njerëzit duhet të mendojnë çfarë vote do të japin për fëmijët e tyre.
Ditën e sotme, Ipeshkëvi i Rrëshenit, Dom Gjergj Meta shpërndau mesazhin e Konferencës Ipeshkvnore të Shqipërisë, ku ndër të tjera prekeshin problematikat e Shqipërisë për sa i përket korrupsionit, largimit masiv të të rinjve dhe shitblerjes së votave.
Mesazhi i Dom Gjergj Metës u mirëprit nga Ambasadorja Yuri Kim, Ambasadori Luigi Soreca, Presidenti Meta, etj.
“Jam shumë dakord me qeverinë amerikane dhe përfaqësuesen këtu, edhe ata të Kishës Katolike që adresuan një plagë të madhe këtu në Shkodër, shitjen-blerjen e votës. Jam dakord që të shesësh votën është mëkat, ta blesh është mëkat. Jam po kaq dakord që këto zgjedhje duhet të jenë ku njerëzit të mendojnë jo sa do marr nga vota, po çfarë vote do të jap për fëmijët e mi.” tha Rama.
