Nga Enkel Demi
Ka një thënie në Shkodër: “Njeri bahet fmi dy herë; kur lind dhe kur bahet plak”. Sak në Shkodër Edi Rama nxorri sërish gishtin e mesit ndaj kalimtarëve që po qëmtonin mospërfillës paradën e tij bashkë me shpurën e rojeve dhe do rilindas sypërmbys. Sak në Shkodër Tinka Kurti është ngjitur për herë të parë në skenën e Teatrit, kurse sot na thotë që duhet të votojmë Edi Ramën, atë tipin e gishtit, i cili me gjasë do e thithi në gojë në 25 prill.
Njeriu është një qenie, e cila është gatuar për ta dashur jetën, prandaj akti i vetëvrasjes, eutanazisë është tronditës dhe shkakton polemika të mëdha që nuk shterrojnë për shumë kohë. Gjithsesi, me përjashtime të vogla njeriu nuk heq dorë lehtë nga jeta, sido që të jenë rrethanat e saj. Kjo është arsyeja që njeriu mbretëron në kushte gjëmash natyrore, fatkeqësi të mëdha, luftë, terror, diktaturë. Kapet me thonj dhe ia del të gjallojë. E drejta për të jetuar është e sanksionuar në kushtetuta, karta të drejtave të njeriut, librat e shenjtë, traktate. Jeta është instikt, prandaj ndërprerja e saj shkakton ndjesi nga më të llahtarshmet. Kjo mund ta bëjë njeriun të përkulshëm dhe të gatshëm për të hyrë në pazar. Çmimi në këto raste është përherë i lirë… as 5 dollarë nuk i ka kushtuar Edi Ramës me dy artistët e mëdhenj, sa një vaksinë.
Por, njeriu është edhe qenie morale, ka ndërgjegjie. Ka plot që kanë shkuar në satër, se nuk kanë shkelur mbi parimet, mbi idealet, ku kanë ngritur monumentin e jetës së tyre. Por, nuk është ky rasti, sepse thënia shkodrane me gjasë është shterruese për dy artistët e mirënjohur.
Ndaj, e mira është ta lëmë plakun në shenjtninë e tij, siç na ka pas thënë Migjeni. E keqja është tek Gishtoja që sërish ka luajtur me dobësinë njerëzore si bën djalli, kur ia ka ënda të të tundojë. Në shkretëtirën e agjërimit a nuk të joshte djalli me mbretërinë e botës, me provën ndaj Zotit, me pasuri, pushtet? Por, jo çdokush ia del, aq më shumë kur djalli të vjen me një vaksinë që të fal jetën, në mënyrë që ta shtysh dhe ca ditë më shumë. Vjen një moshë, kur dekika të hyn në xhep, jo më dita, muaji, viti…
Para disa javësh shkruajta një shkrim me titull: “Po ta kishe nënën gjallë do vaksinoje Tinka Kurtin të parën?”. Në fakt, nuk e dija në atë kohë se për çfarë do ta përdorte Gishtoja artisten e madhe. Sot, e dimë të gjithë që për pushtet ai do të kalonte edhe mbi të ëmën, porsi dikur, tek shkeli mbi babën politik a biologjik qoftë.
Prandaj, nuk duhet, nuk ia vlen rrebeshi i fyerjeve për artistët kolaboracionistë të Rilindjes. Ata u yshtën, u thyen. Yshtësi është dreqi vetë, për atë na duhet temjani.
