“Në një jetë normale parlamentare ato mund të takohen, por çështjet zgjidhen në parlament, jo jashtë parlamentit”
Deputetja demokrate, Jozefina Topalli, është kundër takimit mes kryeministrit Rama dhe kryetarit të PD-së Lulzim Basha. Ajo thotë se çdo marrëveshje vlen vetëm në parlament dhe jo jashtë tij. Duke komentuar takimin e mundshëm mes kreut të PD-së dhe kryeministrit Rama, Topalli thotë: “Nuk kam parë në vende të tjera që një çështje e tillë të shtrohet në politikë apo media, do të takohen dy kryetarët e partive të kryesore apo jo? Në një jetë normale parlamentare ato mund të takohen, por çështjet zgjidhen në parlament, jo jashtë parlamentit.
Një vend që nuk ka asgjë nga normalja, duke filluar nga qeverisja, listat e deputetëve në parlament, nga jeta ekonomike me vështirësi të shumëfishuara, sigurisht që kjo përbën lajm por nuk është një çështje të cilës nuk mund ti përgjigjem unë. As nuk mendoj se çështjet zgjidhen për shkak se po takohen dy persona. Çështjet zgjidhen kur ka një vullnet të fortë politik për ti shërbyer vendit dhe interesit publik. Por nëse i shërben karriges sigurisht që as nuk mendon për papunësinë, ikjen e investitorëve të huaj, as për problemet ekonomike, sociale, largimin e shqiptarëve nga Shqipëria”, tha ish-kryetarja e Parlamentit.
