Partia për Drejtësi, Integrim dhe Unitet përkujton sot 20 shkurtin e vitit 1991, kur pas protestave studentore dhe një vale rebelimi që kaploi mbarë vendin, mijëra qytetarë shembën shtatoren e diktatorit më të egër të Europës.
PDIU shkrehet se sot, 30 vjet më pas, një “Enver i dytë” sundon vendin, ku qindra mijë shqiptarë janë larguar nga Shqipëria falë keqqeverisjes së “Enverit të dytë”.
Deklarata e plotë
Partia për Drejtësi, Integrim dhe Unitet përkujton sot 20 shkurtin e vitit 1991, kur pas protestave studentore dhe një vale rebelimi që kaploi mbarë vendin, mijëra qytetarë shembën shtatoren e diktatorit më të egër të Europës.
Shumë prej nesh ishim ngritur për të rrëzuar simbolin e komunizmit dhe regjimin e vjetër. Fatkeqësisht, ne rrëzuam bustin e Enver Hoxhës, por nuk kemi arritur të rrëzojmë diktatorucët që mbinë pas tij.
Sot, 30 vjet më pas, një “Enver i dytë” sundon vendin. Me të, të rinjtë mbeten të papunë, energjitë e tyre shtypen me politizimin e gjithçkaje, dhe në fund detyrohen të largohen nga vendi.
Sot, 30 vjet më pas, një valë e pandalshme eksodi po shkreton vendin. Qindra mijë shqiptarë janë larguar nga Shqipëria falë keqqeverisjes së “Enverit të dytë”. Shqipëria sot është ndër vendet me emigracionin më të lartë të profesionistëve.
Sot, 30 vjet më pas, Shqipëria vuan ende nga traumat e së kaluarës komuniste. Disa nga xhelatët e regjimet janë ende në pushtet, ndërkohë që të përndjekurit politikë janë lënë krejtësisht në harresë dhe në kurriz të tyre vijojnë abuzimet.
Sot, 30 vjet më pas, është koha të largojmë Edverin, që shqiptarët të jetojnë dhe përparojnë në vendin e tyre.
